近來有家長問我哋，屋企人離咗世，但係唔知可以點用同女女解釋。
「死亡」係啲咩？呢個對於成年人都好難理解嘅概念，又可以如何同小朋友解釋？喺童話故事提及過「死亡」嘅概念大概就係《小紅帽》中狼食咗小紅帽嘅奶婆婆，或《白雪公主》嘅公主食咗毒蘋果瀕臨死亡。但以上嘅故事都未能真係解釋到「生老病死」嘅概念，所以喺學齡前兒童嘅眼中，佢哋對於「死亡」嘅定義係同成人唔一樣嘅。有兒童心理學研究顯示，大多數小朋友都係喺5-9歲先開始逐漸明白「死亡」係一個不可逆轉嘅過程。
📌 問：咁如果小朋友真係問起有關「死亡」嘅問題，應該點樣解釋好呢？
答：利用日常生活中的情境解釋「死亡」概念
與其避而不說，不如直接喺日常生活中教導小朋友咩係「死亡」。例如，種植植物時，我哋都會見證「生老病死」，例如種植綠豆，觀察佢由一粒種子長成一棵植物，繼而衰老死亡嘅過程從而同小朋友解釋「死老病死」係大自然嘅定律。又或者喺街上見到死了嘅昆蟲，不妨停低同觀察，並解釋畀點解佢唔會再郁動。
另外在平日也可以透過生死教育繪本，讓小朋友接觸「死亡」嘅概念（繪本參考：【生死教育繪本系列】https://hkldsa.org.hk/life/）。
📌 問：當小朋友面對家人過身，家長該點樣同佢哋溝通？
答：
-
體諒小朋友嘅異常行為
對於小朋友而言，突然失去至親佢哋未識得如何消化及表達自己嘅情緒，從而可能會做一啲異常行為，例如變得好易發惱、唔理人、或極度粘人，也有啲小朋友會好似無任何反應。而家長能做嘅就係接納佢哋嘅反應，畀比啲時間佢哋佢認識及釋放自己悲傷嘅情緒。
-
解釋失去親人對小朋友嘅影響
話畀佢哋知道以後都見唔到親人，而原本該親人負責嘅事情，如接送小朋友，則由其他人代替。對於基督教家庭而言，也可以同小朋友解釋「死亡」只係暫時嘅分離，日後一家人總會再喺天家相見，以安慰小朋友無需太傷心。
-
與小朋友分享你嘅悲傷
好多時，家長都會選擇收埋傷心嘅一面，以免小朋友見到會擔心。其實，如果你主動同小朋友分享自己傷心嘅心情，並需要時間回覆情緒，咁樣小朋友也能透過觀察，學識點樣面對死亡同埋處理傷心嘅情緒。
-
考慮帶領小朋友見家人嘅最後一面
「畀小朋友見到家人離世嘅樣，唔會嚇親佢哋咩？」帶小朋友去見最後一面可以減低「死亡」嘅神祕感，也有助佢哋唔好留下遺憾同學會面對死亡。當然，呢樣要視乎每個小朋友嘅情況而決定，家長也可以交個選擇權畀小朋友。
「死亡」，係我哋無法避免見證或發生嘅一件事。雖然小朋友年紀尚小，但若早日讓佢哋理解並接受「死老病死」嘅定律，相信日後面對親友過身時，就更懂得如何面對同處理。如果爸媽都未能處理到自己悲傷嘅情緒時，記得要向外界求助。
如果大家有任何育兒難題想搵小君子解答，歡迎inbox我哋！
更多推薦閱讀：