小朋友一路長大，自己思想越來越成熟。由最初聽晒家長話，到依家開始有自己諗法，亦係象徵緊佢哋慢慢步入緊青春期。唔少家長因為小朋友踏入青春期，而會變得特別緊張，擔心小朋友因為青春期而誤入歧途。因此，家長應該未雨綢繆，做好教育小朋友嘅工作，幫助小朋友茁壯成長。今日小君子為各位爸爸媽媽帶嚟6個注意事項，希望可以令到小朋友唔走歪路。

1. 為孩子建立規則的底線

細個嘅時候，爸爸媽媽好多時就會一句「唔得」就算，但隨著小朋友一路長大，會對呢啲規則有疑惑。所以家長應該向小朋友解釋設立呢啲規矩嘅原因，並且設立底線，俾多啲空間小朋友，等佢哋會遵守呢啲底線。

2. 相信孩子會聽你的話

唔少父母都覺得自己小朋友唔聽話，對父母嘅說話「左耳入、右耳出」。事實上，小朋友重視你嘅每一句說話。小朋友每日都喺家長嘅影響下成長，當佢哋遇到問題、誘惑嘅時候，佢總會記得你嘅提醒。

3. 幫助孩子面對壓力

美國賓夕法尼洲立大學心理學Buss教授，喺研究中發現青少年危機同小朋友細個嘅恐懼、壓力係息息相關嘅。相反地，如果家長可以俾到安全、有信任嘅環境比小朋友，佢哋出現青少年危機嘅機會將會大大降低。

4. 培養孩子正面思想

要令小朋友積極向上，首先要令佢哋學習多角度思考。例如，小朋友可以從審視自己每日行程中所發生嘅好與壞事，從而家長從中誘導佢哋學習以正面積極嘅角度看待事物。

5. 教導孩子「停一停，諗一諗」

小朋友雖然生長速度快，然而大腦前額葉需要直至青少年階段先會完成發展。而前額葉係負責認知及處理信息，呢個就解釋到點解小朋友成日做嘢唔諗後果。所以，家長都要保持耐性，教導小朋友做任何事前都應該要「停一停，諗一諗」。

6.每日都要有談天時間

做家務、早睡早起、均衡飲食係習慣，但係你又知唔知屋企人傾計都可以係一種習慣呢？家長每日最好要有20-30分鐘同小朋友傾計，養成好習慣，咁等小朋友大個咗先會繼續同父母傾心事、分享想法。