今次要介紹俾各位家長嘅3條易上手而且風景好嘅行山路線，最適合一家大細喺假期一齊去，喺疫情期間可以鍛鍊身體，抵禦病毒。

1.城門水塘

城門水塘呢條路線絕對係住喺新界嘅香港人最熟悉嘅行山路線之一。風景優美，而且路途平坦又有樹蔭，交通亦算方便，係一條十分適合家庭樂嘅行山路線。而且，呢條山徑路線非常清晰，唔需要擔心會盪失路。

行呢條路線唯一需要留意嘅，就係會有好多「馬餾」喺附近。出發前可以預先告訴小朋友，讓佢哋有心理預備，並提醒佢哋盡量唔好拎食物出嚟、唔好大聲喧嘩驚嚇到野生動物，相信就唔會發生任何意外。

路線：

荃灣地鐵站 → 兆和街/眾安街（乘搭82號綠色專線小巴）→ 菠蘿壩小巴站 → 沿石梯上城門郊野公園遊客中心 → 菠蘿壩自然教育徑 →  城門水塘溪澗（白千層） → 衞奕信徑第7段（城門水塘緩跑徑 → 城門水塘主壩 → 麥理浩徑第7段 → 城門路 →  菠蘿壩小巴站（乘搭82號綠色專線小巴原路返回荃灣站）

長度：8.5公里

需時：6小時左右（包括2小時左右野餐及打卡時間以及1小時嘅來回車程）

2.西貢塔門

塔門對於熱愛戶外活動嘅人黎講都係耳熟能詳嘅地方，因為塔門係香港為數不多，人流較少嘅大草地，係唔少喜愛野餐嘅人嘅至愛。塔門草地又大又空曠，最適合一家大細野餐，小朋友可以放風箏，跑嚟跑去，親親大自然。但需考慮嘅係，塔門較為偏遠，要去黃石碼頭轉乘渡輪，交通花費時間較長。而坐船，小朋友亦有機會會暈船浪。

路線1：

西頁市中心 （乘搭94號九巴前往黃石碼頭）→ 黃石碼頭 （乘搭街渡前往塔門）→ 塔門渡輪碼碩（上岸後轉左沿直行）→ 天后古廟 → 塔門山頂觀海亭（轉右落山） → 塔門大草原（野餐、放風箏最佳地點）→ 塔門渡輪碼碩（乘搭街渡往黃石碼頭） → 西頁市中心 （乘搭94號九巴原路折返）

路線2：

大學站（乘搭272K前往馬料水公眾碼頭）→ 馬料水公眾碼頭（乘搭街渡前往塔門）→ 塔門渡輪碼碩（上岸後轉左沿直行）→ 天后古廟 → 塔門山頂觀海亭（轉右落山） → 塔門大草原（野餐、放風箏最佳地點）→ 塔門渡輪碼碩（乘搭街渡往黃石碼頭） → 西頁市中心 （乘搭94號九巴原路折返）

長度：6.5公里

需時：4.5小時左右（包括2小時左右野餐及打卡時間以及1.5小時嘅來回車程）

3.嘉道理農場

嘉道理農場位於大帽山以北，喺大埔和錦田之間。其好處就係農場有唔少活動可以參加，例如可以觀賞唔同動物及植物嘅展覽館、觀賞台以及精心設計嘅自助遊路線，附近嘅行山徑設施亦十分完善，方便遊客遊覽、探索。而嘉道理農場設有入場費30蚊，但係5歲以下嘅小朋友同60歲以上嘅長者都可以免費入場。

路線：

大埔墟/太和/錦上路站（乘搭64K九巴）→ 嘉道理農場 (可跟據需要自選行山路線）→ 乘搭64K九巴原路折返

長度：不定

需時：不定