香港受殖民地文化所影響，由上世紀就領先全球開始雙語教育——每個接受香港本土教育嘅香港人都需要學習中文及英文兩種語言。去到21世紀，當全球化現象以及國際交流成為常態嘅時候，外語能力對於就業或者升學變得尤其重要， 所以好多家長都會從小培養小朋友學習多種外語。與此同時，好多家長又會擔心小朋友太早學多國語言或者學太多種外語會唔會應付唔嚟……
今日小君子就為各位家長解開小朋友學多國語言嘅五大迷思：
1. 太早學習多國語言會「兩頭唔到岸」?
有家長發現表示，自己嘅小朋友喺雙語環境下成長，喺啱啱學識講句子嘅時候，會將兩種語言交互使用，例如「Eat蘋果」。家長擔心小朋友唔識將兩種語言分開使用，未來會對學校嘅學科學習有影響。但其實有研究顯示，小朋友自4個月開始，就可以透過語言嘅節奏去分辨唔同種類嘅語言。此外，學習多種語言嘅時候會用唔同嘅系統去學習，並唔會影響小朋友學習語言。而小朋友交互使用語言嘅主要原因係因為詞彙量不足，以至要用有限的語言表達自己。（推薦閱讀：【教育學術】為什麼要花這麼多時間、精力學習英文？）
2. 學多國語言會令到小朋友聰明啲？
唔少家長覺得，多國語言只係幫助小朋友考間好學校，或者提早學習語言可以攞好成績。而事實上，學習語言嘅好處不止如此，加拿大約克大學心理學研究團隊喺2012嘅論文發表，雙語學習嘅小朋友更有能力去處理多項任務，而且佢哋嘅社交能力及記憶力亦會較佳。（推薦閱讀：【君子養成路】小朋友新入學係咁喊？五招令小朋友開心去返學）
3. 父母係咪應該只同小朋友講一種語言？
好嘅語言學習環境，係指小朋友可以多啲同能靈活運用語言嘅人溝通嘅環，因為學習語言最重要嘅係經驗，以及感受每種語言背後嘅文化。如果要學好多種語言，就必須要畀小朋友每日有充足嘅時間使用各種語言。
回應呢條問題，父母可以根據小朋友嘅學校，或者身邊嘅朋友，去調節自己同小朋友講邊一種語言。如果小朋友喺學校較多用英文，咁家長喺屋企就可以多啲用中文同小朋友溝通，咁小朋友就可以同時掌握兩種語言。又或者可以以「一家長一語言」策略，即爸爸講英文，媽媽講中文嘅形式去同小朋友相處。
4. 父母同小朋友溝通係咪要避免「中英夾雜」？
劍橋大學喺2012年研究入面發現，雖然小朋友由1歲半左右就會開始明白「中英夾雜」，但小朋友喺學習「中英夾雜」嘅言語時相對較困難，以致「中英夾雜」會令小朋友詞彙量比學習單種語言嘅兒童少。但如果社會入面會經常夾雜多種言語，例如香港，父母「中英夾雜」嘅教導會有助小朋友更快適應社會。（推薦閱讀：【教育學術】 到底英式英文和美式英文的分別是什麼？）
5. 越早學習雙語越好？
沒錯！因為人隨着年齡增長，學習能力會降低，意味着越早開始學習，語言嘅掌握程度會更高。史丹福大學Lew-Williams教授喺2007年發現，小朋友喺越早嘅時間開始雙語學習，佢地成長後嘅口音，詞彙多樣性以及文法理解會比其他兒童更好。（推薦閱讀：【教育學術】2021三個推薦的私人補習中介平台）
每個家長都會希望「望子成龍」，特別喺語言能力方面，對小朋友日後發展更為重要，但係要緊記學習每一種語言都需要時間及耐性，而且要教好自己嘅小朋友之前，首先要自己學好先，咁先可以畀小朋友最優質嘅語言學習環境。如果過程入面發現小朋友喺學習語言方面有困難，應儘早搵言語治療師救助。
參考文獻：
Bialystok, E., Craik, F. I. M., & Luk, G. (2012). Bilingualism: consequences for mind and brain. Trends in Cognitive Sciences, 16(4), 240–250. https://doi.org/10.1016/j.tics.2012.03.001
Byers-Heinlein, K. (2012). Parental language mixing: Its measurement and the relation of mixed input to young bilingual children's vocabulary size. Bilingualism: Language and Cognition, 16(1), 32–48. https://doi.org/10.1017/s1366728912000120
Byers-Heinlein, K., & Lew-Williams, C. (2013). Bilingualism in the Early Years: What the Science Says. LEARNing Landscapes, 7(1), 95–112. https://doi.org/10.36510/learnland.v7i1.632
Lew-Williams, C., & Fernald, A. (2007). Young Children Learning Spanish Make Rapid Use of Grammatical Gender in Spoken Word Recognition. Psychological Science, 18(3), 193–198. https://doi.org/10.1111/j.1467-9280.2007.01871.x
猜你還喜歡這些內容：