今時今日嘅香港，大部份家庭都有聘請工人姐姐幫手做家務，小朋友嘅工作分配亦十分簡單，就係做功課、溫習同上補習或者興趣班，同成年人一樣忙碌。但最近有研究發現，原來小朋友參與喺家務入面，佢哋日後嘅成功機率反而會較大。究竟係咩原因令佢哋成功呢？

1. 提升時間管理技巧

小朋友喺被分配家務之後，要學識點樣優先處理事務，甚至過程中要學識延遲滿足，佢地要先完成家務後，再做自己想做嘅野。家務可以令佢哋學識管理自己嘅時間，以及學會忍耐，要去做自己唔樂意做嘅事，延遲滿足感。

2. 較良好的人際關係

美國明尼蘇達大學研究團隊用咗20年時間去研究做家務對小朋友嘅影響，研究發現受訪者嘅職業生涯選擇、智商、與家人朋友嘅關係都會比冇做家務嘅小朋友嚟得高。做家務嘅小朋友長大後會較為大方，而且更識得同人合作，職場待遇亦會更好。

3. 社會工作經驗縮影

家庭就係社會嘅縮影，每個人都有屬於自己嘅崗位，有自己嘅工作。而小朋友亦唔例外，所以家務就係小朋友嘅「工作經驗」。家務可以訓練到小朋友嘅自制能力，令佢哋更自律，更識得點樣去安排自己嘅生活，對於學業繁忙嘅香港小朋友，呢個技能尤其重要。

4. 習慣為他人奉獻

家務係一種利他行為，早啲比小朋友去接觸家務可以培養佢地嘅歸屬感。透過家長嘅讚賞可以令小朋友有正面回饋，佢哋都會更容易有成就感，自尊感會比其他人較強，令佢哋成為更堅強嘅人。

小朋友做家務有咁多好處，仲唔快啲鼓勵佢哋去做！