最近嘅社交距離稍稍放寬，小朋友喺屋企困咗咁耐，都係時候畀下佢哋出街放電啦！市內遊樂場都係一個唔錯嘅選擇！
講起室內遊樂場，唔係冒險樂園就係Namco？你唔厭小朋友都厭喇😵💫！所以小君子特登搜羅全港九新界唔為人知嘅室內親子好去處，務求可以令各位家長可以同小朋友重捨玩樂新鮮感！今次我哋就會介紹新界嘅室內親子好去處，想知就繼續睇落去啦！
1.浩海立方．探游館
中意海洋嘅小朋友就唔好錯過呢個室內遊樂場喇🐟！位於荃灣楊屋道嘅探游館，係全港首個結合真實生物及投影效果嘅海洋體驗館，佔地萬呎。有得睇海洋生物之餘，仲有室內遊樂場畀小朋友玩，仲可以試下場內嘅歷時3分鐘嘅VR、AR體驗🥳。
館內其中一個特色就係佢嘅「夢幻水母萬花筒」。水箱入面除咗有螢光色嘅燈令水母睇落色彩繽紛，呢個展區亦係一間鏡房，鏡面不斷反射水箱嘅夢幻色彩，最啱打卡。除咗玩之外，館內都有一個造型特別嘅食物就係鯊魚海鹽雪糕喇，海鹽令到個雪糕食落一啲都唔膩，絕對值得一試！
圖片來源: http://cubeodiscoverypark.com/
2.百田遊園
大西北嘅朋友有福喇！想帶小朋友又有多個好地方可以去，唔洗出到咁遠，喺屯門安定商場可以搵到又好玩又大嘅室內兒童遊樂場！百田遊園樓底高，又有落地玻璃，採光度高，玩嘅空間感覺會更大，玩都玩得開心啲啦！
兒童電動車就可能見得多，電動船你又見過未，百田遊園就有個池畀小朋友玩揸下船，夠晒新奇。另外場內仲有彈床同繩網陣，啱晒好動嘅小朋友。想靜態啲嘅都可以去玩具區玩下玩具，場內仲有沙池、積木區等，各應各樣嘅遊樂設施應有盡有。
圖片來源: https://www.facebook.com/real.expert.limited/
3. The Big Thing
The Big Thing位於南豐紗廠，係一間以大自然為主題設計嘅室內遊樂場，佈置風格會令到小朋友好似去咗熱帶雨林咁，場內仲有唔同動物陪小朋友一齊玩。
The Big Thing最好嘅地方就係佢哋隔就有附屬餐廳The Big Thing Kitchen，小朋友去玩時，家長仲可以同同行嘅朋友、親戚喺隔離休息一下，一路食嘢一路睇住小朋友，家長都唔洗怕悶親。南豐紗廠好歡迎家長同小朋友帶寵物一齊去，而且入面仲有其他文青鋪頭，玩完落去行陣先走都得添。
圖片來源: https://www.facebook.com/thebigthingsplayground/
更多親子活動推薦：