平日忙於翻工，無咩時間理小朋友，但係又想同小朋友親密啲，唔知要點做好？今日小君子為各位爸爸媽媽帶嚟5個加強親子聯繫嘅活動，等你可以善用時間同小朋友提升關係！

要同小朋友有親密關係有三項原則，就係同小朋友平等相處，令小朋友覺得你地係共同成長，同埋小朋友可以偶然扮演領導角色。而以下5種活動亦都希望家長可以秉持以上原則，方可加強親子關係。

1. 與孩子一起完成挑戰

當小朋友同爸爸媽媽一齊遇上難關嘅時候，一齊解決問題對親子關係會有正面嘅影響。因為喺解決問題嘅過程入面，父母同小朋友會一齊成長，從中學習。喺日常生活入面，爸爸媽媽可以邀請小朋友去組裝傢具、為屋企嘅設計作建議，從而訓練小朋友嘅解難能力。

2. 邀請孩子一同煮食

雖然家長唔放心比小朋友用利器去處理食材，但有啲簡單步驟小朋友都可以參與其中，例如調味、搣菜或者用木籤串起食物等。呢啲小活動會令小朋友更了解其他人嘅口味以及學習管理時間。

3. 一起玩桌遊

桌遊係一個好好嘅平台比家長同小朋友以公平嘅原則去溝通，因為所有玩家都要遵守桌遊入面訂下嘅規矩，令小朋友可以同家長平等咁相處。

4. 晚餐後的漫步

今晚食完飯，不妨帶小朋友出街行下，但係唔係去購物個啲，而係去一啲可以令人放鬆心情，表達心中情緒嘅地方，例如海傍、公園等地方。散步過程可以釋放多巴胺，令心情變好，喺小朋友同家長溝通嘅好時機。

5. 寫信給孩子

信中可以提及近況，同小朋友一齊回顧一下今年發生過嘅事，特別係小朋友同家長一齊經歷嘅難題，令小朋友明白自己係不斷進步，小朋友亦可以學習以家長嘅角度看待事物，令小朋友更具同理心。